في حاجه اسمها عيب وفي حاجه اسمها حرام !!!

[miss-aya]

السلام عليكم ورحمه الله
النهارده مواضيعي زي العاده في حته مناقشه كدا من مواقف بنشوفها في الحياه
وبنحب نتكلم فيها وبما اننا في منتدي الي حد كبير فيه التزام يبقي مناقشتنا هتكون من
جهة الدين ومن وجهه النظر الدينية


الموضوع النهارده هو الفرق بين الاخلاق وبين التدين
والفرق بين عيب وحرام


وازي ممكن الانسان يمشي بالفطره انه يعمل عمل معين او يقول كلام معين وهو نيته سليمه
وافكاره خاليه من اي شر او شئ قبيح ولكن تاني النتائج عكس ذلك


كدا بقو 3 نقاط
1 الفرق بين الاخلاق والتدين
2- الفرق بين عيب وحرام
3- الفطره ممكن تواجهنا غلط في بعض الاحيان فبنحتاج لاعاده توجيه ومش كل كلمه او تصرف بنعمله بالفطره ممكن يطلع صح


ها حد فهم حاجه:confused: :D

علي العموم انا مستنيه تعليقاتكم
والمره دي كلكم ان شاء الله لازم تعلقو
محدش يدخل ويخرج في صمت


كن ايجابيا :D

[رباب:: سحابة ود]

الموضوع مهم بجد يا آية
ويمكن لكون الواحد بقاله سنوات في منتدي
عمرو خالد
شفنا وعرفنا وعاصرنا مشاكل كتير
وآثار سيئة من الخروج عن المألوف او الفطرة السليمة والعيب
سواء من الشباب والبنات
ويمكن الواحد بمنتهي الثقة يقدر يقول
ان مكانة منتدي عمرو خالد راجعة بدرجة كبيرة
لانضباط الاعضاء والتزامهم ويقظة الاشراف في منع اي
عيب او غلط او حرام
انا اتكلمت عن المنتدي لانه احد وسائل التعامل بين الشباب
والبنات
وعن نفسي كبنت بحترم نفسي وبنقي الكلام
وبعرف الحدود اللي تكون بيني وبين اي ولد اخرها فين
بحس بارتياح شديد لما ادخل منتدي عمرو
او اي منتدي مشابه له
لاني بحس اني داخلة مكان محترم
سبق وروحت منتديات تانية لكن دايما كان في شيء مش بيعجبني
خليني اكون واضحة معاكم اكتر
ونحدد شوية حاجات عيب وممكن فعلها يؤدي لحرام


عيب .. تنادي بنت في المنتدي باسمها
لان ببساطة هتحصل مع الوقت حميمية وتعود
وينكسر حد من الحدود والله اعلم هتقف لحد كده ولا لا
عيب لانه في بنات وشباب في سن ال 12 وال 15
مش هيعرفوا يعملوا كنترول علي حوارهم وداخلين
المنتدي كمنتدي اسلامي يعني تصرفاتنا كاعضاء
نموذج بالنسبة ليهم
تخيل بقي وتخيلي كلمة اخ او اخت تفرق ازاي
واثرها ايه
مع ان في الحياة وبمنتهي الصراحة عمري ما قلت اخ
لاي زميل اتعامل معاه وبكلمهم باسمهم عادي
بس الحياة اللي اعرفك فيها واحط فيها حدود شيء
والحدود اللي في المنتدي اللي تعتبر نموذج للي اصغر مننا شيء تاني
و..............
تابعو المشاركة الجاية وعيب كمان

[رباب:: سحابة ود]

توضيح في غاية الاهمية
كلامي مش انتقاد لمنتدانا ولما اتكلمت عن منتدي
عمرو خالد اتكلمت عن نموذج جيد اتمني نصل لهذا
المستوي وافضل كمان
وتعالو نعتبر مناقشتنا في الصفحة دي
تأسيس لاصول المشاركة في المنتدي
عشان فعلا نكون الافضل وناخد جبال من الحسنات عن كل حرف
بنكتبه
وعشان كده بفكركم ونفسي بالنية قبل ما نكتب اي شيء

http://smiles.fahrs.com//data/34/www.uaekeys.com69.gif

عيب .. الدين الاسلامي يا جماعة شيء رااااااااائع بجد
حقيقي وصدقا
الحمد لله علي نعمة الاسلام وكفي بها نعمة
ومن جمال وعظمة الاسلام اللي وضعه لينا
رب العزة سبحانه وتعالي
انه شمل حياتنا بكل تفاصيلها وجوانبها
وان جاءت حياة النبي صلي الله عليه وسلم
بكل تفاصيلها واضحة لا تقبل شك
فعرفنا النبي القائد
والزوج
والاب
والجد
والارمل الذي ظل وفيا لزوجته الراحلة معترفا بجميلها
شاكرا حسن مودتها
وفي كل تفصيله من الجميل اننا نعرف ونتعلم عن حبيبنا
صلي الله عليه وسلم
ولكـــــــــــــــــــــــــــــــــــــــــــــــ ـــن
هناك بعض الامور والتفاصيل التي لا يستحب النقاش فيها
امورا لا تهم الافئة معينة
وكلنا عارفين اد ايه النت والحياة المفتوحة وفرت للناس
المعرفة بكل اشكالها ومن اكتر من مكان
يعني لازم اللي نكتبه والتفاصيل اللي نقولها
نفكر هل عدد المستفيدين اكتر ولا عدد المتاثرين بشكل سيء اكتر
متهيالي كلامي مش محتاج توضيح
وبفكركم في بنات وشباب بييجوا في سن ال 13 وال 15
فلو انت اب وانتي ام يا تري هتحب ابنك يطلع علي امور
لسه بدري اوي ومينفعش يعرفها حاليا
وايه الضرر اللي يقع علي اخرين كمان
كفاية كده اظن اني قلت ووصلت اللي انا عاوزاه
طبعا احنا اخوات وكتير يعرفوا صدق نيتي واني بقصد خير
مش نقد وتقليل لا سمح الله
و........................
المشاركة الجاية ننزل لارض الواقع شوية
ونسيب المنتدي

[rasha]

السلام عليكم ورحمة الله وبركاته
اولا احييكى جدا على الموضوع جزاكى الله خيرا يا اية ...
شوفى يا اية من رايى ان مفيش فرق خالص بين الاخلاق والتدين لان اى شخص ملتزم بدينه هتلاقى اخلاقه كويسة لان ده كمان من الالتزام ومن التدين ...التدين مش انك تصلى وتصوم وتقرا قران لا الدين المعاملة كمان ده اللى بيعرف اللى ادامك اذا كان الشخص ده ملتزم دينيا ولا لا
نفس الوضع فى كلمة عيب او حرام
معتقدش اى حاجة حرمها ربنا ما بنقولش عليها عادى
فبالتالى اى حاجة حرام لازم هتلاقيها عيب وفكرى فيها كده هتلاقيها صح
اما موضوع الفطرة ده مش عارفة النقطة دى مش واضحة بالنسبالى معلش مش هعرف ارد عليها

ليا تعليق صغير على كلام رباب اللى عجبنى جدا جدا وما شاء الله فعلا كلام جميل ومقنع
بس يا رباب ليه الازدواجية طلما كل حاجة فى النور انتى مثلا بتقولى عمرك ما قلتى لزميل او اى حد فى الحقيقة اخ لكن فى المنتدى هتقولى
سبحان الله طب ما انتى نفس الشخصية هنا وهنا باسلوبك هتقدرى تحطى حدود زى ما حطيتى لزميلك فى شغلك مثلا حدود بانك مثلا ما تتكلميش برايفت او محدش يكلمك كلمة تسئ ليكى او تخدش حيائك
انتى بايدك تعملى كل ده
اما بالنسبة للمواضيع اللى اتكلمتى عليها فعلا انا معاكى فى الراى ده بس يا جماعة لا حياء فى الدين اكيد لو انتى ما استفدتيش من المواضيع دى غيرك استفاد وانتى برده بامكانك انك لو لقيتى الموضوع مش مفيد بالنسبة ليكى بلاش منه زى التليفزيون
القناة اللى تعجبك اتفرجى عليها اللى مش عجباكى حوليها المجال مفتوح والاختيار ليكى
وانتى اللى تقررى العملية ما فيهاش اجبار طبعا
جزاكم الله خيرا جميعا
واسفة للاطالة

[رباب:: سحابة ود]

اسمحي لي يا رشا بالنسبة لمسالة اخ اللي بقولها لاي زميل
في المنتدي مهمة لسبب
مش ازدواجية بس النت حدوده في التعامل مختلفة
حدود بتقررها حتة اني مش معروفة ولا باين مني غير كلامي
وبالتالي الكلام هو وسيلتي الوحيدة للحفاظ علي الحدود
ولكن في الواقع حجابي واسلوبي وحتي صوتي وانا بتكلم
يعني مفيش خضوع بالقول
كل ده بيفرض الاحترام وبياكد ع الحدود بيني وبين الطرف الاخر
وكمان وعن تجربة حية في منتدي عمرو خالد لما بتتشال كلمة اخ واخت
بتدخل حميمية في االكلام مش مقبولة
وبرده عشان نكون نمموذج للاصغر مننا
*****************
الجزء التاني المهم في كلامك يا رشا
اولا .. لا حياء في الدين ده انا عرفت انه حديث ضعيف
ولو فرضنا انه مش ضعيف يبقي انهي اصح بقي
الحياء شعبة من الايمان
وان النبي صلي الله عليه وسلم كان اشد حياء من العذراء في خدرها
اظن كل ده يخلينا ندقق في الكلام
وانا مازلت شايفة انه المواضيع اللي قصدتها في كلامي
لا عائد من وجودها هنا لان الشريحة المتواجدة بالمنتدي
مش من الفئة المستفيدة من الكلام ده
وبرده هذه المواضيع يوجد مواقع تقدم هذه النصائح في اطار ديني محترم
وعلي من يريدها لامر يخصه ان يبحث عنها وده سهل جدا
وبرده للحفاظ علي حالة معينة في المنتدي من الاحترام لانك ببساطة
هتجدي حتي حرج من الدخول وشكر اللي عمل الموضوع
وحرج من ان والدك مثلا يشوف ان في المكان اللي بتكتبي في كلام من النوع ده
حتي لو كان في اطار نصح ديني
لكل مقام مقال
ولكل شيء وقت ومش اي معلومة اللي تنشر علي العلن
وفي آخر كلامي بقولك ان الاختلاف لايفسد للود قضية
وربنا يكرمك علي رايك في باقي كلامي

[M.7aleem]

السلام عليكم ورحمة الله وبركاته

انا مش هعلق على كلام ( رباب - رشا )

انا هعلق على موضوع ( ايه )

انا ومن وجهة نظرى
ان الاخلاق جزء من الدين
فلا مقارنه بين ( اساس و فرع )

وان العيب جزء من الحرام
فلا مقارنه بين ( اساس و فرع)

اما بالنسبه لموضوع الفطره
فكلامك صح يا ايه
ممكن يكون التصرف بالفطره صح احدا التصرفات
وممكن برده يكون غلط

اه معلش فى توضيح بس للحديث بتاع (لا حياء فى الدين ) فهو حديث ضعيف
وليس له اى سند

ارجوا مناقشة الامر من خلال الاداره
ومقصدش موضوع ( ايه )
اقصد كلام ( رباب )
فى اختيار المواضيع المناسبه
لدلك ارجوا ان يناقش الموضوع من خلال الاداره
جزاكى الله خيرا يا ميس ايه
تقبل الله منا ومنكم
صالح الاعمال

[miss-aya]

السلام عليكم مناقشه حلوه
وبجد ممتعه انا هدخل فيها
بعد قليل


متابعه لاخر الاخبار