الاضراب بكرة هتعمل ايه.......؟؟!!!6-4

[miss-aya]

بكره 6 ابريل.... اضراب عام في جميع المصالح الحكوميه
هكذا ينادي الشعب؟؟؟ ها هتعمل ايه؟؟؟
************************************************** ********
انا عن نفسي كدا كدا والحمد لله سبت شغلي وبقيت عاطله عن العمل كلاكيت تاني مره
فكدا كدا في البيت .........
السؤال لو كنت مش عاطله..... كنت هضرب
صراحه مش عارفه مكنتش هضرب عن العمل
ومعرفش ليه يمكن لانني متاكده ان الحكايه مش بالاضراب
وانها محتاجه اكبر من كدا
............

المهم بكرة هتضرب عن العمل والدراسة والبيع والشراء؟؟؟

[M.7aleem]

وانا لسه مستلمتش الشغل
فكدا كدا اضراب
بس بصراحه لو انا واثق ان فى ايجابيات
من الاضراب دا اكيد كنت هديها واحد اضراب
وربنا يستر وميبقاش ضرب مش اضراب
(وش بيضحك)

[miss-aya]

ربنا يوفقك اولا في الشغل اللي هتستلمه ويكون خير عليك باذن الله
ثانيا دا برضو نفس وجهه نظري هل في ايجابيات جالي الاوف دا من شويه

الاخوان يعلنوها .. لن نشارك فى اضراب 6 ابريل وذلك لأنه بلا اهداف ولا وسائل تعلن عنها وايضا لم يسمع الاخوان عن الاضراب الا عن طريق الصحف ووسائل الاعلام ولم توجه اليهم الدعوه ... واقول الى كل من يقول ان الاخوان لم يشاركو فى اى شئ لمصر ... بل شاركوا فى مظاهرات القضاه والاصلاح 2005 ومظاهرات و1ابريل 2008 ...


هو الاضراب دا بالدعوووووات وله ايه؟؟؟؟؟؟؟؟؟؟؟

[Psycho]

انا سمعت رأى احترمته جدا على موضوع الأضراب ده
من دكتور فى كلية علوم....قال ما معناه بالظبط :
" انا لا استمتع بحرية النباح "
و لعلمك احتمال كبير جدا ان اى موظف حكومى يشارك فى الاضراب ده
يتحول للتحقيق
و الله اعلم بأى جهه هاتحقق معاه
ربنا يكرمنا جميعا ويهدينا طريق الصلاح

اما بالنسبه لرأيى فأنا مع رأى الدكتور اللى قلتلكم عليه ده
يعنى الموضوع ممكن يكون ملوش لزمه.....و ممكن يطلع كدبة ابريل
ولا ايه ؟؟

[miss-aya]

والله ممكن يكون كدبة ابريل
وماله اهو ساعتها هنتاكد ان الشعب المصري انتقلت ليه الظرافه بالوراثه
بالمناسبة كلام الدكتورة فعلا صح...
طيب الحمد لله اني مش لوحدي حاسه بنفس الاحساس

[mr.dragon]

السلام عليكم ورحمة الله وبركاته

عارف ان الاضراب معاده خلاص فات واللى اضرب اضرب واللى راح الشغل راح الشغل

ولكن انا شايف من الردود والتعليق عليها عدم وضوح الهدف م الاضراب

انا اشجع على الاضراب لأن الحكومه لازم تحس ان فى حاجه اسمها شعب فى البلد دى

اما بالنسبه لرأى الدكتور فصراحة انا شايف انه رأى سلبى

وشكرا

[Psycho]

الاضراب مش دايما مفيد يا مستر دراجون
لازم يكون مدروس كويس جدا بحيث انه ميضرش بمصالح اى حد
لأن فى الاول و فى الاخر
دى بلدنا وكلنا هايصيبنا الضرر... ( لو حصل ضرر يعنى )...
مش فئه معينه بس هى اللى هاتضر
طبعا انت ليك الحق فى انك تقول رأيك وتتمسك بيه كمان
زى ما اى حد ليه نفس الحق ده
و زى ما بيقولو...... الاختلاف فى الرأى لا يفسد للود قضيه

ربنا يجزيك كل خير

[mr.dragon]

السلام عليكم

طبعا انا اتفق معاك تماماً عندما يوضح هيكون فى نتائج افضل

ومع رأيى الاخوان اللى قالو انهم مايعرفوش الهدف من الاضراب عشان كده ماشركوش

ب النقطه هنا ان احنا دايما بنحب نكون الجمهور المشجع
يعنى لازم نستنى اما حد يعمل حاجه طيب ليه منعملش احنا

مهو لو الشعب لو اتفق على حاجه عملها عمرنا ما هيحصل فينا اللى بيحصل دا

ولو الموظفين كلهم فعلا اضربوا مكنوش هيقدروا يحولوا كل الموظفين للتحقيق

وكان نفسى الدكتور اللى قال مبيستمتعش بالنباح كان يقلنا هو بيستمتع بأيه

وفى النهاية السلبية مرض خطير لازم الشعب يتخلص منه

وطبعا انا ضدد التخريب فى ممتلكات البلد

وشكرا جزيلا

[miss-aya]

انا مستمتعة بالنقاش واسمحولي اني اقول رائي عباره عن مزيج من رائ الدكتور وراي البشمهندس
وطبعا الاختلاف في الرائ ارجو اكمال النقاش المفيد جداا

[محمد سعيد]

انا مضرب عن الاضراب

[miss-aya]

انا مضرب عن الاضراب



جميلة حكايه مضرب عن الاضراب دي
عموما هنالك الالف حدث لهم حوادث في المحله... عموما محافظات الغربية... من الاضراب
يمكن تكون هزه ضعيفه لعرش قوي....:mad:

[Psycho]

معلش يا جماعه اتأخرت فى الرد
بس انا لسه عند رأيى برده
فى اغلب الاحيان مينفعش يحصل اضراب
و ادينا شوفنا ايه النتيجه
فى ناس بتصطاد فى الميه العكره
حصل ضرب و حرق وتخريب
و كله ده كان ضحيته الناس البسيطه
اصحاب المحلات والعمال والناس اللى كانت ماشيه ملهاش فى اى حاجه اصلا
و المحله فى ليله واحده كانت ممكن تخرب من اولها لاخرها
صعب صعب صعب جدا
اننا ننظم اضراب عندنا هنا فى مصر
الناس هى اول الخسرانين من الاضراب ده
كده الناس هاتضر نفسها
المفروض انه يبقى فيه نقاش و حوار
و كل ده له طرق شرعيه كتير يتم بيها
و عن طريق النقاش ده كل الناس تقدم مطالبها ويتم البت فيها ان كانت تصلح للتنفيذ ولا لأ
اما بالنسبه للدكتور فأنا معرفش هو بيستمتع بأيه لأنى معرفهوش اصلا
بس اعرف انه رأيه صح الى حد ما
لما الواحد ياخد حريته فى انه يتكلم ويتكلم ويصرخ كمان....
بس مفيش حد بيسمعه..
هل بكده كلامه وصراخه ده ممكن يفيده ؟؟
لأ طبعا..
بالعكس ده ممكن يضره
فالأفضل انه يسكت عن الكلام و يدور على طريقه بناءه توصله لهدفه
و اتمنى ان الجميع يشارك ويقول رأيه فى الموضوع ده...
جزيتم الجنه

[miss-aya]

بص يا توفيق هو رايك صح الناس فعلا بتتضر من الاضراب انا شفت مهازل حصلت في المحله غير ان القوات دلوقتي محاصرينها
تخيلو مدينه بحالها محاصره ... بس احنا ممكن نفكر كدا ثواني اهل المحله عملو كدا ليه... مش من ازمه العيش والغلاء اللي في الدنيا مش من كيلو اللحمه اللي بقي 50 جنيه ومش من الحياه اللي كلها كوسه ومحسوبيه ورشوي .... الناس فاض بيها خلاص سبحان الله زمان كان الحاكم بينزل بليل من غير ماحد يحس يشوف احوال الناس دلوقتي الحكام في برج عالي ومش عارفين حاجه عن اي حاجه


الحقيقه ان الاضراب هو اخر ما تبقي للشعب المصري من كرامه
لاننا فعلا خايفين يهاجرو من البلد ويحلو ما يرجعو....

انا مع ان الاضراب خراب مع شويه مناظر غير حضاريه ولكن النقاش لا يسمن ولا يغني من جوع

حوار هائل ربنا يحفظكم...

[mr.dragon]

معلش يا جماعه اتأخرت فى الرد

بس انا لسه عند رأيى برده
فى اغلب الاحيان مينفعش يحصل اضراب
و ادينا شوفنا ايه النتيجه
فى ناس بتصطاد فى الميه العكره
حصل ضرب و حرق وتخريب
و كله ده كان ضحيته الناس البسيطه
اصحاب المحلات والعمال والناس اللى كانت ماشيه ملهاش فى اى حاجه اصلا
و المحله فى ليله واحده كانت ممكن تخرب من اولها لاخرها
*****************************
السلام عليكم
اولا يا اخى اللى حصل فى المحله مفيش اختلاف انه امر مئساوى ولكن مينفعش نحكم من غير ما نعرف ملابسات الموقف

لأن اللى حصل ان ضباط الامن بدئوا بضرب المتظاهرين اولا
والقاعده بتقول لكل فعل رد فعل
الناس كانت بتنفس عن غضابها
وكمان الناس اضربو عن العمل
جت الجرائد والتليفزيون المصرية كالعاده
وقالت ان الجو عسل وفل وياسمين ومفيش اضراب

الناس اتخنقوا اكتر عملو مظاهرة تانى يوم حصل اللى حصل

انا بحمل مسئولية اللى حصل دا للحكومه مع التحفظ على موقف اهل المحله
********************************
صعب صعب صعب جدا
اننا ننظم اضراب عندنا هنا فى مصر
الناس هى اول الخسرانين من الاضراب ده
كده الناس هاتضر نفسها
المفروض انه يبقى فيه نقاش و حوار
و كل ده له طرق شرعيه كتير يتم بيها
و عن طريق النقاش ده كل الناس تقدم مطالبها ويتم البت فيها ان كانت تصلح للتنفيذ ولا لأ
**************************************
مش عارف اضحك ولا اعمل ايه معذرة يعنى

كلامك محسسنى انك مش عايش فى البلد

طرق شرعية ايه اللى بتتكلم عنها يا استاذى

الاضراب دا كان اخر حاجه الناس بتحاول بيها تاخد بيه حقها
لما منفعتش الطرق الشرعية اللى حضرتك بتقول عليها
************************************
اما بالنسبه للدكتور فأنا معرفش هو بيستمتع بأيه لأنى معرفهوش اصلا
بس اعرف انه رأيه صح الى حد ما
****************************
احنا ممكن نقول ان رأيه عباره عن نقد ... تمام؟
طيب لو حبينا نصنف النقد دا يبقى نقد ايه
بنّاء ولا هدّام
النقد البناء لازم يقول بينتقد ليه ويجيب البديل معندوش البديل يبقى الافضل انه يسكت

*************************************
لما الواحد ياخد حريته فى انه يتكلم ويتكلم ويصرخ كمان....
بس مفيش حد بيسمعه..
هل بكده كلامه وصراخه ده ممكن يفيده ؟؟
لأ طبعا..
بالعكس ده ممكن يضره
فالأفضل انه يسكت عن الكلام و يدور على طريقه بناءه توصله لهدفه
و اتمنى ان الجميع يشارك ويقول رأيه فى الموضوع ده...

جزيتم الجنه
********************************
اخى الفاضل اختلف معك تماما فلولا الصراخ ماكان ليسمعك احد وما كنا لنشعر بمأساتنا
وما يجرى فى المطبخ السياسى

اذا فالافضل ان نعيش نأكل ونشرب ونصلى وننام ونموت :mad:

اين الايجابيه ؟ فين كلمة الحق عند ملك ظالم ؟ فين دورنا كمسلمين ملتزمين فى المجتمع

وبالنسبه للضرر

فهذه الامه تقوم على انقاض ابنائها

وجزاكم الله خيرا



جزاكم الله خيرا ارجو قرأة التعليق باللون الاخضر